ក្រុមហ៊ុន ខនហ្វីរេល ហ្វឹកហ្វឺនប្រជាកសិករ
កាលបរិច្ឆេទ: ១៣ មីនា ២០២៤ / ម្ហូបអាហារ / Author : Veng Thavong
នៅថ្ងៃទី ២៨-២៩ ខែកុម្ភ: ឆ្នាំ២០២៤ ក្រុមហ៊ុន ខនហ្វីរេល បានបើកវគ្គបណ្តុះបណ្តាលដល់ប្រជាកសិករ ស្តីពីបច្ចេកទេស ដាំដុះ ថែទាំ និងប្រមូលម្រេចកំពតសរីរាង្គ ដល់កសិករនៅខេត្តកំពតចំនួន៥០គ្រួសារក្នុងគោលបំណងណែនាំប្រជាកសិករពីចំណេះដឹងក្នុងការដាំដុះ និងថែទាំម្រេចកំពតប្រកបដោយគុណភាព និងស្របតាមស្តង់ដាសរីរាង្គ។ បន្ថែមពីនេះទៅទៀតនៅក្នុងវគ្គបណ្តុះបណ្តាលនេះបានបង្ហាញពីវិធានការនៃការរក្សាទុកផលិតផលសម្រេចឱ្យបានត្រឹមត្រូវ និងមានសុវត្ថិភាពដើម្បីរក្សាគុណភាពផលិតផលឱ្យបានល្អ និងសមស្របតាមតម្រូវការទីផ្សារ។ ទន្ទឹមនេះផងដែរក្រុមហ៊ុនខនហ្វីរេលបានចុះកិច្ចសន្យាទិញលក់ម្រេចកំពត និងម្រេចកំពតសរីរាង្គជាមួយកសិករន្ទាប់ពីបញ្ចប់វគ្គបណ្តុះបណ្តាលនេះប្រកបដោយភាពជោគជ័យ។
វគ្គបណ្តុះបណ្តាលនេះ ដឹកនាំ និងបណ្តុះបណ្តាលដោយលោក ឌុន ទិត្យារិទ្ធ ទីប្រឹក្សាបច្ចេកទេសដាំដុះម្រេចកំពតសរីរាង្គនៃក្រុមហ៊ុន ខនហ្វីរេល។
ក្រុមហ៊ុន ខនហ្វីរេល សូមថ្លែងអំណរគុណយ៉ាងជ្រាលជ្រៅដល់ Cambodia Harvest III ដែលបានរួមចំណែកក្នុងការរៀបចំ និងគាំទ្រយ៉ាងពេញទំហឹងជំរុញឱ្យវគ្គបណ្តុះបណ្តាលនេះប្រព្រឹត្តទៅបាន ក្នុងការបង្កើននូវចំណេះដឹងដល់កសិករក្នុងការ ដាំដុះ និងថែទាំ ម្រេចសរីរាង្គ ឱ្យស្របតាមស្តង់ដាសរីរាង្គ និង ផលិតផលសម្គាល់ភូមិសាស្ត្រម្រេចកំពត (GI)។ បន្ទាប់ពីបញ្ចប់វគ្គបណ្តុះបណ្តាលនេះយើងក៏សង្ឃឹមថា កសិករទាំងអស់នឹងបន្តចែករំលែកចំណេះដឹងទាំងនេះទៅកសិករផ្សេងៗទៀតដើម្បីទទួលបាននូវផលិតផលដែលមានគុណភាពល្អ និងស្របតាមតម្រូវការទីផ្សារអន្តរជាតិ។
ទន្ទឹមនឹងនេះដែរក្រុមហ៊ុន ខនហ្វីរេល នឹងបន្តព្យាយាមធ្វើការបណ្តុះបណ្តាល និងប្រឹងប្រែងស្វែងរកទីផ្សារជាតិ និងអន្តរជាតិជូនប្រជាកសិករដើម្បីធ្វើឱ្យម្រេចកំពតកាន់តែមានតម្លៃខ្ពស់សាកសមទៅនឹងកម្លាំងពលកម្មដែលប្រជាកសិករខិតខំប្រឹងប្រែងធ្វើបាន។
